Қашқадарёда эркак аёлини арра билан ўлдиргани айтилмоқда
Ҳодисага оилавий можаро сабаб бўлган.
Қашқадарёда эркак оилавий можаро сабаб хотинини электрон арра билан ўлдиргани айтилмоқда. Бу ҳақда “Сукут сақлама” лойиҳасида хабар берилди.
Қайд этилишича, 2007 йилда турмуш қурган ва 3 нафар фарзандли эр-хотин оилавий можаро сабаб жанжаллашиб қолган. Эркак аёлини ота-онасиникига жўнатиб юборган ва 2 нафар ўғлини кўришга рухсат бермаган.
Бир куни эркак занжирли арра билан аёлининг юзи ва бўйнига бир неча марта урган. Шундан сўнг эркак отасига қўнғироқ қилган. У келинининг қонга беланган жасадини кўриб, дарров участка нозири ва келиннинг укасига қўнғироқ қилган. Аёлга тез ёрдам чақирилган, бироқ у касалхонада вафот этган.
Эркак ички ишлар органларига бориб, қилмишидан пушаймонлигини ва айбига иқрорлигини айтган.
Тергов давомида эркакнинг ҳаракатларида аёлни ўлдириш мақсади борлиги аниқланган, чунки у учрашувдан бир неча кун олдин занжирли арра сотиб олган. Суднинг 2023 йил 7 июндаги ҳукми билан айбланувчи Жиноят кодексининг 97-моддаси 1-қисми билан айбдор деб топилиб, 13 йил муддатга озодликдан маҳрум этилган.
