Сўнгги уч йилда никоҳсиз туғилган чақалоқлар сони очиқланди
Рақамлар ўтган йилларга қараганда кўпроқ.
Республикада сўнгги уч йилда туғилган 54 минг нафардан ортиқ чақалоқлар ёлғиз она аризаси асосида рўйхатга олинган. Бу ҳақда Олий Мажлис Қонунчилик палатаси йиғилишида маълум қилинган.
Қайд этилишича, сўнгги пайтларда мамлакатда фақатгина диний расм-русумларга биноан тузилган никоҳлар сони ва бунинг ортидан кўп хотинлик ҳолатлари ортиб бормоқда.
Маълум қилинишича, 2022 йилда республика бўйича 18 минг 955 та ҳолатда туғилган чақалоқлар ёлғиз она аризаси асосида қайд этилган. 2021 йилда ушбу кўрсаткич 19 минг 37 тани, 2020 йилда 16 минг 564 тани ташкил қилган.
Депутатлар никоҳ белгиланган тартибда ФҲДЁ органларида қайд этилмагани оталикни белгилаш, алимент тайинлаш, мерос масалаларига оид турли хил муаммоларни келтириб чиқариб, натижада фуқароларда, айниқса, аёлларда давлатнинг ҳуқуқий сиёсатига нисбатан бўлган ишончи йўқолишига сабаб бўлаётганини ҳам таъкидлаган.
Статистика агентлиги маълумотларига кўра, 2022 йилда республика бўйича 932 минг 192 та тирик туғилиш ҳолатлари ФҲДЁ органларида қайд этилган. 2023 йилнинг 1 июль ҳолатига Ўзбекистон аҳолиси сони 36,4 миллион кишини ташкил этмоқда. Шундан аёллар — 18,1 миллион нафар, эркаклар — 18,3 миллион нафар.
