Тошкентда дарахтлар қасддан қуритиб ташланди
Оқибатда табиатга 1 млрд зарар етказилган.
Ижтимоий тармоқларда Тошкент шаҳрининг Олмазор туманида дарахтлар қасддан қуритилаётганлиги ҳақида хабарлар тарқалди. Ҳолат юзасидан Экология вазирлиги расмий муносабат билдирди.
Аниқланишича, “Airport house builders” МЧЖга тегишли бўлган ҳудудда жами 19 туп манзарали дарахтларга қасддан қуритиш мақсадида зарар етказилган.
Тошкент Ботаника боғи хулосасига кўра, дарахтлар қуриш ҳолатига келиб қолган. Оқибатда ўсимлик дунёсига 1 миллиард 97 миллион 184 минг сўм зарар етказилганлиги маълум бўлди.
Ҳозирда тегишли ҳужжатлар ҳолатга ҳуқуқий баҳо бериш ва тегишли чора кўриш мақсадида прокуратура органларига юборилган.
