“Мақсадимиз турли мамлакатларнинг анъанавий спорт турлари орқали уларнинг маданиятини тарғиб қилишдир”

 

Бугун Хива шаҳрида жойлашган “Ичан-қалъа” мажмуасида халқаро Этноспорт фестивалига старт берилди. Ўтказилаётган мазкур мусобақаларда дунёнинг 63 дан ортиқ давлатидан спортчилар ўзаро баҳс олиб боришмоқда. Zamon.uz сайти мухбири айни дамда жараёнларни кузатиб бормоқда.

 

Фестивалда бевосита Бутунжаҳон Этноспорт конфедерацияси раиси Нажмиддин Билол Эрдоған ҳам иштирок этмоқда. Бугун бўлиб ўтган саммитдан сўнг Нажмиддин Билол Эрдоған мазкур фестивалнинг аҳамиятли томони ва нега айнан Хива шаҳрида ўтказилаётгани ҳақида ўз фикрларини билдириб ўтди.

 

“Бундай фестивалларга  қизиқиш йилдан-йилга ортиб бормоқда. Бу йил баъзи сабабларга кўра фестивални Туркияда ўтказа олмадик, шунинг учун гўзал ва қадимий Хива шаҳрини танладик. Бу эса кўпчиликка маъқул келди. Жуда кўп инсон бу шаҳарни кўришни хоҳлайди.

 

Бугун ҳақиқатдан ҳам ажойиб учрашув бўлди. Ушбу тадбирга 60 дан ортиқ давлатдан 2000 га яқин спортчилар, иштирокчилар ва меҳмонлар ташриф буюришди. Шу муносабат  билан биз Ўзбекистоннинг бу  гўзал шаҳрини кўпчиликка таништиришга ёрдам беряпмиз. Бундан ташқари, Хивага ташриф буюрган барча меҳмонларга Ўзбекистоннинг анъанавий спорти ва маданияти билан яқиндан таништирамиз. Умуман олганда, барчамизнинг  мақсадимиз дунёдаги турли мамлакатлар ва жамиятларнинг анъанавий спорт турлари орқали уларнинг маданиятини тарғиб қилишдир.

 

Маданият алмашинуви ўзаро ҳурмат доирасида амалга оширилади. Шахсан мен ўзаро ҳурматни ўрнатиш учун,  ҳар бир киши ўз маданиятини ўзига ишонган ҳолда тақдим этиши зарур деб ҳисоблайман. Бу каби тадбирлар ана шундай мақсадларимизга замин яратади. Ўзбекистон Ёшлар сиёсати ва спорт вазирлиги, Ўзбекистон Этноспорт ассоциацияси ҳамда ташкилотга ҳисса қўшган барча ҳомийларга ўз миннатдорчилигимни билдираман”, — дейди у.