Фарғонада 3 киши ароқдан заҳарланиб вафот этди
Улар қўлбола усулда тайёрланган ароқдан истеъмол қилган.
Аввалроқ Фарғона вилоятида етти киши қўлбола ароқдан заҳарлангани, улардан бири вафот этгани ҳақида хабар берилганди. Бош прокуратура ахборот хизмати раҳбари Ҳаёт Шамсутдиновнинг маълум қилишича, вафот этганлар сони тўрт нафарга етди.
5 сентябрь куни вилоятнинг Қўштепа туманида яшовчи икки киши номаълум моддадан заҳарланиш оқибатида соғлиғи ёмонлашиб, туман тиббиёт бирлашмасига олиб келинган. Шу куни Олтиариқ туманида яшовчи беш нафар фуқаро номаълум моддадан заҳарланиб, туман тиббиёт бирлашмасига мурожаат қилган.
Ўшанда заҳарланганлардан бири вафот этганди. Бош прокуратура берган маълумотга кўра, яна уч киши қўлбола ароқдан вафот этди.
Ҳолат юзасидан 6 сентябрь куни Жиноят кодексининг 186 (хавфсизлик талабларига жавоб бермайдиган товарларни ўтказиш мақсадини кўзлаб ишлаб чиқариш, сақлаш, ташиш ёхуд ўтказиш, ишлар бажариш ёки хизматлар кўрсатиш) ва 186-1-моддалари (этил спирти, алкоголли маҳсулот ва тамаки маҳсулотини қонунга хилоф равишда ишлаб чиқариш ёки муомалага киритиш) билан жиноят иши қўзғатилиб, гумон қилинувчи A.Д. процессуал тартибда ушланган.
Айни пайтда тергов давом этмоқда.
