2030 йилга келиб ичимлик суви билан таъминланганлик даражаси 90 фоизга етказилади

 

Ҳозирги кунда республикада 25,6 фоиз аҳолига ичимлик сув махсус техникалари ёрдамида ташиб келтирилади. Мавжуд бўлган 10 942 та сув иншоотининг ҳар бештасидан биттаси, 89 минг км марказий ва ички тармоқларнинг 26,5 фоизи таъмирталаб ҳолатга келиб қолган. 

 

Сенатнинг 36-ялпи мажлисида Жиззах вилояти Зафаробод тумани “Бирлик” ва “Ёрқин” маҳаллалари ҳудудигача диаметри 450 мм. бўлган, узунлиги 13,5 км ичимлик сув қувурларини янгидан қуриш учун 7 млрд сўм ажратиш орқали аҳолининг ичимлик суви таъминотини яхшилаш масаласи сенаторлар томонидан кўтарилган эди.

 

Ушбу масала юзасидан Сенатнинг Аграр ва сув хўжалиги масалалари қўмитаси масъул этиб белгиланиб, тегишли вазирлик ва идоралар билан ҳамкорликда масалага ечим топиш юзасидан ишлар олиб борилди.

 

 “Ўзсувтаъминот” АЖ,  Жиззах вилояти ҳокимлиги ишчи гуруҳ тузиб, “Файз коммунал қурилиш” МЧЖ томонидан 7,2 млрд сўмлик 15 км ичимлик суви тизимларини қуриш ишлари амалга оширилди. Натижада Зафаробод тумани “Ёрқин” ҳамда “Бирлик” маҳаллалари аҳолиси ичимлик суви билан таъминланди.

 

Маълумотларга кўра, 2017-2023 йиллар мобайнида жами 5 870 та объектда қурилиш ишлари олиб борилиб, салкам 32 минг км ичимлик ва оқова сув тармоқлари қурилган ва реконструкция қилинган. Ушбу ишлар натижасида 11,8 млн аҳолининг ичимлик сув таъминоти яхшиланиб, 6,6 млн аҳоли илк бор ичимлик сув билан таъминланган.

 

Ўзбекистонда 2030 йилга келиб марказлашган ичимлик сув билан таъминланганлик даражасини 90 фоизга етказиш режа қилинмоқда: 2023-2030 йилларда республика бўйича қарийб 50 минг кмдан зиёд ичимлик сув тармоқлари ҳамда 2 000 дона иншоот қуриш ва реконструкция қилиш кўзда тутилган. Ушбу ишларга 28,5 трлн сўм (18 трлн сўми халқаро молия институтлари иштирокида) маблағ ажратилади.