Наманганда “Ота-оналар боғи”га асос солинди
У Наманган муҳандислик-қурилиш институтида ташкил этилди.
Наманган муҳандислик-қурилиш институтида ташкил этилган ота-оналар форумига келганлар иштирокида олий ўқув юрти ҳудудига кўчатлар экилди.
Бундан олдин нуронийлар дуога қўл очиб, яратилажак боғ умрбоқий бўлишига тилак билдиришди.
Каштан, павлония каби кўчатлар олдиндан тайёрлаб қўйилган чуқурларга солиниб, сув қуйилди ва тупроқ тортилди.
— Бу кўчатларни сизлар экяпсизлар, назорати эса бизнинг ходимлар ва талаба фарзандларингиз, невараларингизда бўлади. Вазир ташаббуси бўлган ушбу тадбирни энди доимий равишда давом эттириб, анъанага айлантирамиз, — деди кўчат экишда иштирок этган институт ректори Шарифжон Эргашев.
