“Ҳудудгаз Бухоро” мансабдорлари 26 млрдлик газни ўғирлади

 

Энергоресурслардан ноқонуний фойдаланган “Ҳудудгаз Бухоро” газ таъминот филиали ходимларига суд ҳукми ўқилди. Бу ҳақда вилоят прокуратураси хабар берди.

 

Қайд этилишича, Жиноят ишлари бўйича Когон туман суди томонидан  судланувчилар А.Жабборов, Ж.Султонов, М.Ҳайитов ва А.Абдуллаевларга оид жиноят иши кўрилган. Судланувчилар М.Ҳайитов ва А.Абдуллаевлар “Дилдора” МЧЖ раҳбари А.Жабборов ҳамда “Осиё Бухоро газ” МЧЖ раҳбари Ж.Султонов билан тил бириктириб энергоресурсларини ўғирлаш жиноятларини содир этишган.

 

М.Ҳайитов 2022 йил 15 августдан “Ҳудудгаз Бухоро” газ таъминот филиали метрология хизмати бошлиғи вазифасида, А.Абдуллаев метрология хизмати етакчи муҳандиси вазифасида ишлаган. Улар жамият раҳбарлари А.Жаббаров ва Ж.Султоновлар билан олдиндан жиноий тил бириктириб, жамиятга қарашли газ қуйиш шохобчаларига келган алоҳида табиий газ қувурининг уланиш нуқтасига ўрнатилган “Автопилот-ПРО” русумли газ ҳисоблаш ускунаси ўрнатилган хонанинг эшигини тамғаланишини таъминламасдан, газ ҳисоблагич ускунасидаги мавжуд импульс трубкаси тамғасини газ маҳсулотлари қувурларида ўғирлик қилиш мақсадида ҳеч қандай ҳужжатсиз алмаштирган. Натижада “Ҳудудгазтаъминот” акциядорлик жамиятининг жами 26,1 млрд сўмлик жуда кўп миқдордаги табиий гази ўғирланиб, яширин равишда талон-торож қилинган.

 

Суд ҳукмига кўра, Жиноят кодекси 169-моддаси 4 -қисмининг “а” банди, 209-моддаси 2-қисмининг “а” банди, 228-моддаси 2-қисмининг “а,б” бандлари билан айбли деб топилган А.Жабборов, Ж.Султоновлар 11 йил, А.Абдуллаев ва  М.Ҳайитовлар 9 йилга озодликдан маҳрум этилди.

 

Шунингдек, айбланувчилар томонидан 6 млрд сўм зарар қопланганлиги сабабли қолган 20,1 млрд сўм зарарни судланувчилардан солидар тартибда ундирилиши белгиланди.