Андижон ҳокими эҳтиёжманд оилага уй совға қилди
Вилоят раҳбари уларни ишга ва ўқишга жойлашга ҳам ваъда берган.
Андижон вилояти ҳокими Шуҳрат Абдураҳмонов вилоятдаги эҳтиёжманд оилага янги уй совға қилди. Бу ҳақда ҳокимнинг расмий саҳифасида маълум қилинди.
Қайд этилишича, ҳоким Избоскан тумани «Гулистон» маҳалласида аҳоли муаммоларини ўрганган. Ушбу оиланинг хонадонида бўлиб, шароитини кўздан кечирган. Шундан сўнг оилага икки хонали уй совға қилган. Шунингдек, аёлни ишга, қизини эса ўқишга жойлашга ваъда берган.
“Эрталаб кўчиб борасиз. Ўша ерда қизингни мактабга ўқишга, сени эса ишга жойлайман. Ҳам ишлайсизлар, ҳам ўқийсизлар”, — дейди Шуҳрат Абдураҳмонов.
Ушбу оилага Янги Андижон шаҳридан 2 хонали уй калитлари топширилган. Вилоят ҳокими ташаббуси билан яқин бир ҳафта ичида хонадон керакли қўшимча жиҳозлар (юмшоқ мебель, стол-стул в.ҳ.) билан ҳам таъминлаб берилади. Хонадон оила бекаси номига ҳеч қандай тўлов шартларисиз, ҳеч қандай кредит тўловисиз, тўлалигича бепул йўсинда расмийлаштирилади.
