“Темирйўл компанияси автомобилда юк ташиш билан рақобат қила олмаяпти”
Президент ҳузурида темирйўл соҳасидаги масалалар юзасидан йиғилиш бошланди.
Президент Шавкат Мирзиёев ҳузурида темир йўл соҳасида ҳал қилиниши лозим бўлган асосий масалалар юзасидан йиғилиш бошланди. Бу ҳақда давлат раҳбари матбуот хизмати хабар бермоқда.
Қайд этилишича, сўнгги етти йилда мамлакатда саноат корхоналари сони 2,7 бараварга ошиб, 110 мингтага етган, 2 мингдан зиёд турдаги янги маҳсулот ишлаб чиқариш йўлга қўйилган, саноат ҳажми 1,5 бараварга ошган.
Экспорт ҳажми 1,6 баробар кўпайиб, ўтган йили 19 миллиард долларга етди. Булар ҳисобига мамлакатда юк айланмаси 30 фоизга ошди. Айниқса, Тошкент шаҳри, Тошкент вилояти, Самарқанд ва водий вилоятларига юк ташиш 1,5 баравар кўпайди.
Шу билан бирга, халқаро майдондаги вазият ҳисобига транспорт-логистика харажатлари бир неча баробар ошиб кетди.
Ўзбекистон каби дунё океанларига тўғридан-тўғри чиқиш имкони йўқ мамлакатлар учун энг қулай ва арзон транспорт бу – темир йўл ҳисобланади.
Лекин ҳозир ички бозорда маҳсулотнинг атиги 5 фоизи, экспортда эса 45 фоизи темирйўл орқали ташилмоқда. Яъни темир йўл компанияси автомобилда юк ташиш билан рақобат қила олмаяпти.
