Ўзбекистонда илк бор пичоқ улоқтириш чемпионати ўтказилди
2 кун давом этган чемпионатда 60 га яқин иштирокчи қатнашган.
Пичоқ улоқтириш бўйича илк бор Ўзбекистон чемпионати бўлиб ўтди. Бу ҳақда Мудофаа вазирлиги хабар берди.
Қайд этилишича, чемпионатда 55 нафардан ортиқ ҳарбий хизматчилар ва бошқа спортчилар иштирок этган. Ушбу чемпионатни ўтказишдан асосий мақсад - 13-14 октябрь кунлари Ўзбекистонда бўлиб ўтиши режалаштирилган жаҳон чемпионатига терма жамоани шакллантириш.
"Чемпионатда биринчи ва иккинчи ўринларни қўлга киритган спортчилар терма жамоа сафига қабул қилинади. Пичоқ улоқтириш спорти яқинда алоҳида федерация бўлиб ташкил этилди. Шунинг учун ушбу федерация қошида аёллар ва эркаклардан иборат терма жамоа шакллантирилади. Мақсадимиз, сараланган жамоа билан биргаликда жаҳон ареналарида юртимиз шаънини ҳимоя қилиш. Ҳозирда сараланаётган спортчилар орасида жаҳон чемпионлари ҳам борлиги бизни албатта қувонтиради. Демак, биз ҳаракат қилсак, бунданда юқори марраларни забт этишга имкониятимиз ва кучимиз етади, – дейди Ўзбекистон пичоқ улоқтириш спорти федерацияси вице-президенти Ойбек Маҳмудов.
