“Йўқол бу ердан, ифлос”. ЎзМУ проректори талабанинг онаси билан жанжаллашди

 

Ижтимоий тармоқда Ўзбекистон Миллий университети проректори талабанинг онаси билан жанжаллашаётгани акс этган видео тарқалди. Ҳолат юзасидан университет маъмурияти изоҳ берди.

 

Ҳолат сентябрь ойи биринчи ўн кунлигида рўй берган. Мурожаатчи аёл проректор қабулига кирган ва қизи геология факультети 1-курси кечки бўлимга ўқишга кирганини айтиб, талабалар тураржойидан ўрин ажратиш ва иш билан таъминлашни талаб қилган. Проректор аёлга кечки таълим шаклида таҳсил оладиган талабалар учун ётоқхона етишмаслиги, ўринлар кундузги таълим шаклида ўқийдиган талабаларни қамраб олганини билдирган.

 

“Аёл тушунишни хоҳламай, у ҳолда иш билан таъминлаб берасизлар, деб талаб қўйган. Проректор агар имконият топсак, мактаблардан иш гаплашиб берамиз, деб керакли тавсияларни берган. Аёл эса фарзандига университетдан иш ҳал қилиб бериш талабини қўйган”, - дейилади хабарда.

 

Қайд этилишича, талаблари тўлиқ қаноатлантирилмаган аёл кетар чоғида университет раҳбарияти ва проректорни ўринсиз ҳақоратлаб кетган. Куракда турмайдиган сўзлар проректорнинг нафсониятига теккан ва у ҳам аёлга нисбатан қўпол сўзларни ишлатган. Шу вазият мурожаатчи томонидан ёзиб олинган ва “проректор мурожаатчи аёлни ҳақорат қилди” деган маънодаги қисми тарқатилган. Мазкур вазиятга проректор котибаси, университет хотин-қизлар қўмитаси раиси ҳамда қабулдаги фуқаролар гувоҳ бўлишган.

 

Университет проректори билан рўй берган ушбу ҳолатда адолатли қарор чиқариш юзасидан тегишли орган томонидан текшириш ишлари олиб борилмоқда. Вазият тўлиқ ўрганилиб, ҳолатга ҳуқуқий баҳо берилгунича ҳозирда видеода акс этган проректор ўз вазифасидан вақтинча четлатилди ва унинг вазифалари университетнинг бошқа масъул проректорига юклатилди.

 

Тегишли текширувлардан сўнг проректорга ташкилий, интизомий ёки маъмурий чора кўриш бўйича якуний қарор қабул қилиниши билдирилган.