Тожикистондаги ГEСлар Ўзбекистоннинг электрга бўлган талабини қондиришга йўналтирилади
Бу ҳақда Остона шаҳрида бўлиб ўтган Шанхай Ҳамкорлик Ташкилоти энергетика форумида маълум қилинди.
Тожикистонда янги қурилаётган гидро электр станциялари яқин истиқболда Ўзбекистонда электр энергиясига нисбатан ўсиб бораётган талабни қондириш учун йўналтирилади. Бу ҳақда мамлакат энергетика вазири Сорбон Холмуҳаммадзода 4 октябрь куни Қозоғистоннинг Остона шаҳрида бўлиб ўтган Шанхай Ҳамкорлик Ташкилоти энергетика форумида маълум қилди.
Вазирнинг айтишича, ШҲТ давлатлари Тожикистонда янги ГEСлар қуришда фаол иштирок этмоқда.
"Масалан, Тожикистоннинг Зарафшон дарёси ҳавзасида ГEС қуриш ва фойдаланиш учун Ўзбекистон билан ҳамкорликда акциядорлик жамияти ташкил этилди. Станцияларда ишлаб чиқариладиган электр энергияси қисқа муддатда Ўзбекистонда, ўрта ва узоқ истиқболда эса минтақанинг бошқа мамлакатларига ўсиб бораётган талабни қоплашга йўналтирилиши режалаштирилган" , - дейди у.
Бундан ташқари мамлакат электр станциялари умумий қувватини 375 мегаваттга етказиш учун энг йирик ГEСларини реконструкция қилишни режалаштирмоқда.
