Амударёда автомактаб ходими пора билан ушланди
У пул эвазига фуқарони имтиҳонлардан ўтказиб қўймоқчи бўлган.
Қорақалпоғистон Республикаси ва Сирдарё вилоятида ҳайдовчилик гувоҳномасини олиб беришни ваъда қилган фирибгарлар ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Мирзаобод туманида ўтказилган тезкор тадбирда фуқаро Д.Т. фуқаро А.с.га гўёки ИИБда ишловчи танишлари орқали ҳеч қандай ўқув машғулотларига қатнашмасдан “В”, “с” тоифадаги ҳайдовчилик гувоҳномасини олиб бериши эвазига 400 АҚШ доллари ва 400 минг сўмни олган вақтида ашёвий далиллар билан қўлга тушган.
Амударё туманида ўтказилган тезкор тадбирда “А.П.” МЧЖ автомактаби инструктори О.Х. фуқаро Ш.У.ни ҳайдовчилик гувоҳномасини олиш учун бўлиб ўтадиган имтиҳондан танишлари ёрдамида ўтказиб қўйиши эвазига 400 АҚШ долларини олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
