Тошкент аэропортида Осиё ўйинлари иштирокчилари тантанали кутиб олинди
Бош вазир спортчиларни ғалаба билан табриклаб, Президент номидан табрик сўзини ўқиб эшиттирди.
Тошкент вақти билан соат 19:30 да “Uzbekistan Airways”нинг Ханчжоудан учган самолёти 19-ёзги Осиё ўйинларида иштирок этган миллий терма жамоа билан пойтахт аэропортига қўнди.
Ўзбекистон терма жамоаси медаллар сони ва сифати бўйича тарихдаги энг яхши натижани кўрсатди ва 71 та медаль – 22 та олтин, 18 та кумуш ва 31 та бронзани қўлга киритиб, Осиё ўйинларидаги иштирокини якунлади. Умумжамоа ҳисобида ўзбекистонлик спортчилар Хитой, Япония, Жанубий Корея ва Ҳиндистон билан бирга 45 нафар иштирокчи давлат орасида энг кучли бешликдан жой олди.
Жамоани Тошкент аэропортида расмий кутиб олиш маросимида мутасаддилар, санъаткорлар, спортчилар, мураббийлар, жамоа аъзоларининг яқинлари иштирок этди. Ўзбекистон Бош вазири Абдулла Арипов спортчиларни ғалаба билан табриклаб, Президент Шавкат Мирзиёев номидан табрик сўзини ўқиб эшиттирди. Маросим меҳмонлари орасида Тошкент ҳокими Шавкат Умурзоқов, сенатор Маҳмуд Тоир, халқ артистлари Фаррух Зокиров ва Озодбек Назарбековлар ҳам бўлди.
