Шавкат Мирзиёев Туркия Президентига табрик йўллади
Табрик Туркия Республика эълон қилинган куннинг 100 йиллиги муносабати билан амалга оширилган.
Президент Шавкат Мирзиёев Туркиянинг миллий байрами – Республика эълон қилинган куннинг 100 йиллиги муносабати билан Президент Режеп Таййип Эрдоғанга табрик йўллади.
Мактубда икки халқ ўртасидаги умумий тил, муштарак урф-одатлар, ўзаро ҳурмат ва ҳамжиҳатлик тамойилларига асосланган кенг қамровли стратегик шериклик алоқалари сўнгги йилларда сифат жиҳатидан юксак босқичга кўтарилиб, янги тарихий даврни бошлаб бергани катта мамнуният билан таъкидланган.
"Насиб этса, Сиз билан биргаликда халқларимизнинг умумий равнақини таъминлаш йўлида келишиб олган барча йирик лойиҳа ва аниқ дастурларни тўлиқ амалга оширамиз ҳамда кўзлаган улкан марраларимизга албатта эришамиз", - дейилади жумладан қутловда.
Давлат раҳбари Туркия етакчиси ва оила аъзоларига сиҳат-саломатлик, фаровонлик ва бахт-саодат, масъулиятли давлатчилик фаолиятида янги зафарлар, қардош турк халқига эса тинчлик-омонлик, бардавом тараққиёт ва юксалишлар ёр бўлишини тилади.
