Божхоначилар ўтган 9 ойда 9 минг килограммга яқин гиёҳвандлик воситаси айланмасини фош этди
Бу ҳақда Божхона қўмитаси ахборот хизмати раҳбари маълум қилди.
Ўтган 9 ойда 16200дан ортиқ ташқи фаолият қатнашчисига божхона тўловларидан 39 триллион сўм миқдорида имтиёз ва преференциялар қўлланилди. Бу ҳақда АОКАда ўтказилган брифингда Божхона қўмитаси ахборот хизмати раҳбари Нурбек Саломов маълум қилди.
Маълум қилинишича, жорий йилнинг ўтган 9 ойида 6,2 триллион сўм миқдоридаги божхона тўловларини кечиктириб тўлашга рухсат берилди. Давлат бюджетига 40,3 триллион сўм миқдорида маблағ ўтказилди. Хавфларни бошқариш ва яширин иқтисодиётга қарши курашиш йўналишида 780 миллиард сўмлик товарларнинг ноқонуний айланмасига чек қўйилган.
Бундан ташқари, аҳоли соғлиги ва хавфсизлигини таъминлаш мақсадида жами 8 минг 935 килограммга яқин гиёҳвандлик воситалари, 619 минг дона психотроп ва кучли таъсир этувчи моддалар, 4 миллион 800 минг қути тамаки маҳсулотларининг ноқонуний айланмаси фош этилди.
