Қирғизистонда қизамиқ авж олмоқда: 2 та мактаб онлайн таълимга ўтди
Бу ҳақда мамлакат Таълим ва фан вазирлиги маълум қилди.
Жалолобод шаҳрида хавфли вирусли касаллик – қизамиқ тарқалиши сабабли иккита мактаб масофавий таълимга ўтказилди, дея маълум қилди Қирғизистон Республикаси Таълим ва фан вазирлиги.
Маълумотларга кўра, бундай қарор эпидемия ва эпизоотияга қарши махсус комиссия томонидан чиқарилган.
“Шундай қилиб, Қ.Зокиров номидаги 2-умумтаълим мактаби ва А.Усмонова номидаги 7-мактаб ўқувчилари қизамиқ касаллиги тарқалиши сабабли масофавий таълимга кўчирилди”, — дейилади хабарда.
Шунингдек, мазкур қарор билан Жалолобод шаҳар таълим бўлимига ушбу касалликка қарши эмлашдан бош тортган ёки 063-сон шакл бўйича бир марталик эмланган ўқувчилар сонига аниқлик киритиш, ҳар бир мактаб ва болалар боғчасида тиббий кўрикдан ўтиш ва эмлаш учун алоҳида хоналарни жиҳозлаш топширилди.
