"Миллий бойлигингизни дунё билан баҳам кўраётганингиз учун катта раҳмат"
Темурийлар ассоциацияси асосчиси Ўзбекистон маданияти ҳақида гапирди.
Яқинда Ўзбекистонга Франция президенти ташриф буюрган эди. Давлат раҳбари ҳамкасби билан Ўзбекистон маданий мероси намуналари билан танишганди. Мана шу учрашувнинг шахсан гувоҳи Темурийлар ассоциацияси асосчиси ва президенти Фредерик Брессанд Самарқандда бўлиб ўтаётган халқаро конгрессда ушбу учрашув ва маданий мерос ҳақида гапирди.
"Айтишим мумкинки, менда президентингиз ижобий таассурот қолдирди, Шавкат Мирзиёев учун маданият асосий масалалардан бири эканини англадим. Ҳозирда ўз маданиятингизни оламга ёйиш учун сизда барча имкониятлар мавжуд. Президент Макрон бундан жуда ҳам ҳайратланди.
Ўзбекистонга келишимдан аввал Парижда мамлакатингиз маданияти ва тарихига оид иккита кўргазмада қатнашгандим. Бу жуда яхши ўйланган лойиҳа эди, чунки Европада одамлар Ўзбекистон ҳақида кўп нарса билмайди. Айнан ўша кўргазмалар ортидан эса одамлар мамлакатингиз жаҳон маданиятида асосий фигуралардан бири эканини билиб олди.
Сўнгги йилларда Бутунжаҳон жамияти томонидан қилинган ишлар ўз натижаларини бера бошлагани ва Ўзбекистон дунё маданияти бешикларидан бирига айланаётганини кўриш мени қувонтирмоқда. Бунинг учун ҳукуматингиз, президентингиздан миннатдорман. Бу билан жамиятингизни табриклайман, ўз миллий бойлигингизни дунё билан баҳам кўраётганингиз учун катта раҳмат", деган у.
