Хитой интеллектуал транспортлар бўйича Ўзбекистон билан ҳамкорлик қилмоқчи
Бу орқали ҳаракат хавфсизлигини таъминлаш режалаштирилмоқда.
Хитой компанияси интеллектуал транспорт тизимини жорий этишда Ўзбекистон билан ҳамкорлик қилмоқчи.
Транспорт вазирининг биринчи ўринбосари Маманбий Омаров “Anlu International” компанияси вице-президенти билан учрашди.
Унда интеллектуал транспорт тизими ҳамда йўлларда транспорт оқимини бошқаришда инновацион ечимларни жорий этиш масалалари муҳокама қилинди. Томонлар бу орқали ҳаракат хавфсизлигини таъминлаш йўналишида ҳамкорлик қилмоқчи.
“Anlu International” компанияси 2012 йилда ташкил этилган. Компания халқаро миқёсда интеллектуал транспорт ва “хавфсиз шаҳар” лойиҳаларини амалга оширади.
Шунингдек, Африка, Яқин Шарқ ва Ғарбий Осиё, МДҲ, Жанубий-Шарқий Осиё, Лотин Америкаси, Европа ва бошқа минтақалардаги 30 дан ортиқ хорижий давлатларга ўз хизматларини кўрсатмоқда.
