Бухородаги тарихий бинога реклама баннери ва «кондиционер» ўрнатилди

 

Маданий мерос агентлиги ҳолатга муносабат билдирди.

Маълум қилинишича, мутахассислар иштирокида олиб борилган ўрганишлар жараёнида шаҳарда жойлашган маданий мерос объекти ҳисобланган «Турсунжон» мадрасасининг ташқи деворига ҳаво совиткич ва реклама баннери тарихий объектлардан фойдаланиш талабларига зид равишда ўрнатилганлиги аниқланди. Ушбу ҳолатни бартараф этиш мақсадида объектга ўрнатилган ҳаво совиткичи ва реклама баннери олиб ташланди. Шунингдек, бинонинг ҳужрасидан ноқонуний фойдаланиб келаётган фуқарога нисбатан чора кўрилди.

 

Маданий мерос агентлигининг Бухоро вилоят бошқармаси томонидан келгусида шу сингари ҳолатларнинг олдини олиш мақсадида объект фойдаланувчиларига тушунтириш ишлари олиб борилди.

Шунингдек, агентлик бу каби ҳолатларга кенг жамоатчиликнинг бефарқ бўлмагани ҳамда маданий мерос объектларини асраб-авайлашга ўз ҳиссаларини қўшаётганликлари учун миннатдорчилик билдирди.