АИ-80 бензинига қўлланган солиқ имтиёзи муддати тугади

Аи-80 маркали бензин учун акциз солиғига вақтинчалик нол ставка қўллаш даври 2023 йил 31 декабр куни якунига етди. Бугун, 1 январдан автомобилларга ёнилғи қуйиш шохобчаларида бу маркадаги бензин 6800 сўмдан сотилмоқда.

 

Ижтимоий тармоқда эса арзон бензиннинг нархи ошгани хақида хабарлар тарқалди. Энергетика вазирлиги бунга изоҳ бериб, аслида нарх ошмаганини, балки имтиёз бекор бўлганини маълум қилди.

 

Қайд этилишича, давлат раҳбарининг 2022 йил 12 декабрдаги ва 2023 йил 23 февралдаги қарорлари билан 2023 йил 31 декабрга қадар импорт қилинадиган, маҳаллий корхоналар томонидан ишлаб чиқариладиган ва тадбиркорлик субъектлари томонидан якуний истеъмолчиларга сотиладиган Аи-80 русумли автобензин маҳсулоти учун, истисно тариқасида, акциз солиғи “ноль” ставкада қўлланилган.

 

Аи-80 русумли автобензин маҳсулоти учун акциз солиғи “ноль” ставкада қўлланилиши унинг етказиб бериш харажатини сезиларли даражада туширишга имкон берди. 2022 йили автобензиннинг нархи ушбу қарор қабул қилинишидан олдин 7500 сўмни ташкил этган бўлса, солиқ бўйича имтиёз қўлланилгач, 5700 сўмгача тушган.

 

Бугунги кунда автобензиннинг автомобилларга ёнилғи қуйиш шохобчаларига бозор тамойиллари асосида биржа савдолари орқали сотилиши ва унинг нархи эркин шаклланиши туфайли Аи-80 русумли автобензин 1 литри учун “Мустанг”да 8000 сўм, “Интранс Сервис”да 8400 сўм, “Пойтахт Ойл”да 8200 сўм, “ИБР”да 8000 сўм, “Арена Петрол”да 8000 сўм ва “Фатҳ Ойл”да 8200 сўмдан сотилмоқда.

 

Бозорда рақобатни шакллантириш ва давлат бюджетига тушмаган маблағлар ўрнини қоплаш мақсадида 2024 йилнинг 1 январидан мазкур солиқ имтиёзи бекор бўлди. Ушбу кундан бошлаб “Uzbekneftegaz” бренди остидаги АЁҚШларда Аи-80 русумидаги автобензиннинг чакана нархи 1 литр учун 6800 сўм этиб белгиланади", дейилади хабарда.