"Қўйлиқ" бозоридаги тадбиркорлар "Food City" ва "Тashkent Index"га кўчирилади
Пойтахт ҳокимлигининг маълум қилишича, Тошкент қишлоқ хўжалик маҳсулотлари улгуржи бозорида реконструкция ишлари бошланади.
Пойтахтнинг барча бозорларига маҳсулотларни асосий етказиб берувчиси бўлган Тошкент қишлоқ хўжалик маҳсулотлари улгуржи бозорида реконструкция ишлари бошланади. Бу ҳақда Тошкент шаҳар ҳокимлиги хабар қилди.
Қайд этилишича, бозорга олиб келинаётган маҳсулотлар бозор ҳудудига сиғмай, атрофидаги ҳудудларда, шу жумладан Чирчиқ канали бўйида тартибсиз савдо амалга оширилаётгани ҳамда бозор ҳудудига кунига 600 дан ортиқ юк машиналари кириб-чиқиши автомобиль йўлларнинг тирбандлигига асосий сабаб бўлмоқда ва аҳолига жиддий ноқулайликлар яратмоқда.
Реконструкция даврида тадбиркорлар ўз фаолиятини "Food City", "Тashkent Index" ва бошқа савдо мажмуаларида ташкил этилган шароитларда давом эттирилиши таклиф қилинади.
Бунда, тадбиркорлар мулкларини кўчириш билан боғлиқ бўлган харажатлар (транспорт, юклаш, тушириш ва бошқалар) бепул амалга оширилади ҳамда савдо мажмуаларидаги дўконлар учун ижара тўловларидан 3 ой муддатга озод қилинади.
Аҳолига қулай шароит яратиш мақсадида "Қўйлиқ" массивидан бозор ҳудудигача йўлкира олинмайдиган 10 та автобус йўналишга қўйилиб, жамоат транспорти учун шоҳ бекат ташкил қилинди ва шаҳарнинг барча йўналишларга чиқиш имкони яратилди.
Бозорда фаолият юритаётган 144 нафар ишчи-ходимлар "Food City" ва "Тashkent Index" савдо мажмуаларида иш билан таъминланади.
