Андижонлик эр-хотин 1 ёшли боласини уриб, кўмиб юборгани айтилди

 

Ижтимоий тармоқда тахминан 1 яшар гўдакни аёл шафқатсизларча ураётгани, яна бир лавҳада эса ана шу болани аёл билан эркак ерга кўмаётгани тасвирланган видео тарқалди.

 

Аниқланишича, бу шахс Андижон вилояти Жалақудуқ туманида яшовчи 1995 йилда туғилган A.Г. бўлиб, ҳозирги пайтда у (2016 йилдан бери) Россия Федерациясининг Новосибирск шаҳрида турмуш ўртоғи Б.И. билан яшаб келади. Шунингдек, видеотасвирдаги гўдак A.Г. ва Б.И.ning 2019 йилда туғилган фарзанди Р.X. эканлиги аниқланди.

 

Мазкур ҳолат юзасидан Ўзбекистон Республикаси Бош прокуратураси тегишли сўровига асосан Бош консулхона ҳамда Новосибирск области ИИВ ходимлари билан ўзаро тезкор маълумотлар алмашиниши натижасида, 19 январь куни Б.И ва A.Г. лар Бердянск шаҳрида қўлга олиниб, просессуал тартибда ҳибсга олиндилар.

 

Россия Федерацияси Тергов Қўмитасининг Новосибирск шаҳри (Октябрский райони) тергов бошқармаси томонидан A.Г. ва Б.И. га нисбатан РФ ЖК 117-моддаси (қийнаш) билан жиноят иши қўзғатилди ва ҳозирда тергов ҳаракатлари олиб борилмоқда.

 

Мазкур жиноят иши юритуви доирасида Ўзбекистон фуқароси бўлган вояга етмаган Р.X. манфаатларини таъминлаш юзасидан Ўзбекистон Республикаси Бош прокуратураси Россия Федерацияси тергов қўмитаси билан ҳуқуқий ҳамкорлик чораларини давом эттирмоқда. Бу борада қўшимча равишда маълумот берилади.