Сурхондарёда мактаб болалари овқатдан заҳарланди
Ҳолат бўйича расмийлар изоҳ берди.
Ижтимоий тармоқларда Сурхондарё вилояти Сариосиё туман ихтисослаштирилган мактаб-интернатида жорий йилнинг 18 январь куни ўқувчилар овқатдан заҳарлангани ҳақида хабар тарқалди.
Расмий хабарларга кўра, мактаб-интернат ётоқхонасига 120 нафар ўқувчи жойлашган бўлиб, шундан 32 нафарида 2024 йил 18 январь куни соат 22:00-24:00 оралиғида соғлиғи билан боғлиқ кўнгил айниши, ошқозонда ва қоринда оғриқлар кузатилган.
Мазкур ҳолат бўйича мактаб-интернат ҳамшираси биринчи ёрдам кўрсатган, қўшимча ёрдам учун тез ёрдам ходимларининг кўрсатмасига кўра туман тиббиёт бирлашмасига олиб борилган.
Жорий йилнинг 19 январь куни Сариосиё туман Санитария ва эпидимиoлогия осойишталик маркази томонидан мактаб-интернат ошхонасининг санитария ҳолати тўлиқ ўрганилиб, 18 январь куни ўқувчиларга берилган нонушта, тушлик ва кечки овқат намуналари таҳлил учун олинган.
Ҳозирда барча ўқувчиларнинг соғлиги яхши. Вазият ИИБ, СЭС ҳамда таълим муассасалари агентлиги томонидан назоратга олинган.
