Андижонда прокурор ўринбосари пора билан ушлангани айтилди
Ҳолат бўйича БП расмий баёнот берди.
Ижтимоий тармоқда Андижон вилояти Асака тумани прокурорининг ўринбосари тадбирда пора билан қўлга тушганлиги ҳақида хабарлар тарқалди. Ҳолат юзасидан Бош прокуратура расмий баёнот берди.
Маълум қилинишича, Андижон вилояти прокуратураси ва Давлат хавфсизлик хизмати вилоят бошқармаси ходимлари иштирокида ўтказилган тезкор тадбирда бир фуқаро Асака тумани прокуратураси иш юритувидаги жиноят иши бўйича енгиллик қилиб беришни ваъда қилиб, фирибгарлик йўли билан бошқа фуқародан талаб қилинган 15 000 АҚШ долларини олган вақтида ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (Фирибгарлик) билан жиноят иши қўзғатилиб, гумонланувчи шахс процессуал тартибида ушланган.
Таъкидланишича, Асака тумани прокурорининг ўринбосари тадбирда пора билан қўлга тушганлиги ҳақидаги маълумотлар мутлақо ҳақиқатга тўғри келмайди.
