Ўзбекистонда 2023 йилда чиқинди учун 565 млрд ундирилди
Ҳозирда 8 та вилоятда чиқинди тўловлари учун янги тарифлар тасдиқланган.
2023 йилда чиқиндиларни тўплаш ва олиб кетиш бўйича аҳолига кўрсатилган хизматлар учун “Ягона электрон тизим”да 565 млрд сўм маблағ ундирилди. Бу ҳақда АОКАда ўтказилган брифингда Санитар тозалаш ишларини ташкил этиш республика маркази ахборот хизмати раҳбари Дилноза Комилова маълум қилди.
Корхоналарнинг моддий-техника базасини мустаҳкамлаш учун Осиё тараққиёт банки маблағлари ҳисобидан 300 та 12 куб сиғимли, Марказ маблағлари ҳисобидан эса 41 та 7 куб сиғимли махсус техникалар лизинг шартлари асосида санитар корхоналарига топширилди.
Натижада бугунги кунда санитар тозалаш хизматлари билан аҳолининг қамров даражаси қўшимча 2,5 млн кишига, яъни 30 фоизга ортишига эришилган.
Мамлакатда мавжуд 299 та чиқиндини қайта ишлаш корхонаси томонидан қамровга олинган аҳолидан олиб чиқиб кетилган 7 млн тоннага яқин маиший чиқиндининг 2,5 млн тоннаси қайта ишланиб, уларнинг қайта ишлаш даражаси 37 фоизга етказилди.
Бугунги кунда Андижон, Самарқанд, Фарғона, Наманган, Тошкент, Сирдарё, Бухоро, Сурхондарё вилоятларида ва Тошкент шаҳрида чиқинди тўловлари учун янги тарифлар тасдиқланишига эришилди.
