Сурхондарёда Open budget ютган маҳалла кўчасига сифатсиз асфалт ётқизилди
Мутасаддилар ҳолатни ўрганди.
Ижтимоий тармоқларда Сурхондарё вилояти Бандихон тумани Пахтакор маҳалласида Open budget’да ютган маҳалланинг кўчасида лойнинг устига асфалт ётқизилаётгани айтилган видео тарқалди.
Туман ҳокимлиги ахборот хизматининг хабар беришича, видеода тилга олинган муаммо мутасаддилар иштирокида ўрганилган.
Ўрганиш давомида “Ташаббусли бюджет”нинг 2023 йил 2-мавсумида ғолиб бўлган Пахтакор маҳалласи кўчаларини пудратчи “Сурхон Сервис Барака” МЧЖ бажараётгани аниқланган.
Маълум бўлишича, пудратчи 2024 йил 25 январ куни асфалтлаш ишларини амалга ошираётиб, об-ҳаво ноқулай келгани сабабли ишни тўхтатган.
Асфалт қилинган йўлнинг 34 метр қисмида намгарчилик кузатилгани сабабли иш сифатсиз бажарилган. Пудратчига сифатсиз ётқизилган асфалтни қайта амалга ошириш бўйича 29 январь куни ёзма кўрсатма берилган. Ҳолат туман прокуратураси назоратига олинган.
