Ўзбекистон ОТМларида йўналишлар сони 40 фоизга қисқартирилиши мумкин
Бу ҳақда Президент раислигида ўтказилган йиғилишда маълум қилинди.
Ўзбекистон ОТМларида бакалавр йўналишлари сони қисқартирилиши кутилмоқда. Бу ҳақда Шавкат Мирзиёев раислигида ижтимоий соҳадаги устувор вазифаларга бағишланган йиғилишда маълум қилинди.
Президент Олий таълим вазирлигига бакалавр йўналишларини йириклаштириш ҳисобига уларнинг сонини 40 фоизга қисқартириш, ушбу йўналишлардаги таълим дастурларини Топ-300 га кирган олийгоҳлар дастури асосида янгилашни топширди.
Йиғилишда 50 минг коллеж-техникум ўқувчисини дуал таълим билан қамраб олишни ташкил қилиш ҳам топширилди. Бу ишлар, аввало, тўқимачилик, қурилиш ва қурилиш материаллари, элтехсаноат, машинасозлик йўналишларида бошланади.
Бундан буён билим ва малакани баҳолаш жараёнлари босқичма-босқич нодавлат ташкилотларга ўтказилади.
Аниқ ва фундаментал фанлар бўйича илғор дарсликларни хорижий тиллардан босқичма-босқич таржима қилиш кераклиги ҳам кўрсатиб ўтилди.
