Тошкент метросининг 2 та янги бекати қачон очилиши изоҳланди
Транспорт вазирлиги расмий муносабат билдирди.
Транспорт вазирлиги хабарига кўра, синов жараёнлари шу йилнинг 15 март кунига қадар ўтказилиши режалаштирилган. Ишлар якунлангач, ерусти метро линиясининг “Турон” ва “Қипчоқ” бекатларини ўз ичига олган участкаси фойдаланишга топширилади.
“Бугунги кунда ерусти метро линияларини қуриш, фойдаланишга топшириш, топшириш олди синов жараёнларини ўтказиш ўрганилган хориж тажрибаси натижаларидан келиб чиқиб, шунингдек, синов жараёнларини ўтказиш бўйича тасдиқланган меъёрий техник талаблар асосида амалга оширилмоқда”, – дейилади расмий хабарда.
Эслатиб ўтамиз, Қурувчилар даҳасидан Сергели мавзесигача бўлган “Турон” ва “Қипчоқ” метро бекатларининг қурилиши 2023 йил сўнгида якунланиб, 15 декабр куни поездлар ҳаракати синов тариқасида бошланган эди.
Қўйлиқдан Сергелигача бўлган ерусти ҳалқа йўли жами 7 та метро бекатини ўз ичига олган. Унинг қурилиши 2020 йилнинг декабрь ойидан бошланган. 2023 йил апрел ойида бекатларнинг 5 таси аҳолига фойдаланишга топширилганди.
