2024 йил ҳисобида 9 мингдан ортиқ бола гепатит А юқтириб олган
Бу ҳақда Санитария-эпидемиологик осойишталик ва жамоат саломатлиги қўмитаси ахборот хизмати раҳбари маълум қилди.
Мафтуна Саидовага кўра, Ўзбекистонда 2024 йилнинг 9 феврал ҳолатига кўра, 9507 нафар болада Гепатит А касаллиги аниқлаган. Касалланиш кўрсаткичларининг ўсиши Андижон, Бухоро, Наманган, Сурхондарё, Самарқанд, Фарғона вилоятлари ва Қорақалпоғистон Республикасида кузатиляпти.
Таъкидланишича, гепатит А касаллигига қарши эмлаш 94-98 фоиз ҳолатда вирус юқишининг олдини олади ва эмлашдан кейин эҳтимолли жиддий асоратлар кузатилмайди.
ЖССТ тавсиясига кўра, бу вакцинанинг хавфсизлиги ва сифатини кафолатловчи сертификатлари мавжуд бўлиб, вакцинация бир маротаба қўлланади, қайта эмлаш талаб этилмайди. Вирусли гепатит А касаллигига қарши асосан 18 ойликдан 14 ёшгача бўлган болалар эмланади.
