Самарқандда бензовоз аварияга учради
Бензин тўкилиши оқибатида ёнғин келиб чиққан.
Бугун, 25 февраль куни Самарқанд вилояти Пахтачи туманида бензин ташувчи автомашинада ёнғин юз берди.
Ҳолат соат 01:05 да Пахтачи тумани “Худойберди” МФЙдан ўтувчи м-37 автомобил йўлида содир бўлган. Бухоро-Тошкент йўналишида ҳаракатланиб келаётган МЕРС русумли бензовоз машинаси ҳаракат давомида тиркамаси шинаси ёрилиши оқибатида учқун чиқиб, орқа тиркамаси силкиниши сабаб бензин маҳсулоти тўкилиб, оқибатда ёнғин келиб чиққан ва автомашина тиркамаси ва кабина қисми ёнган.
ФВБ ходимлари томонидан ёнғин зудлик билан ўчирилган. Ҳеч кимга тан жароҳати етмаган.
Мазкур ҳолат юзасидан Пахтачи туман ИИБ ҳузуридаги ТБ томонидан терговга қадар текширув ҳаракатлари олиб борилмоқда.
