28 дона iPhone15'ни ноқонуний олиб кирмоқчи бўлганлар ушланди
Ҳозирда ҳолат юзасидан терговга қадар текширув ҳаракатлари олиб борилмоқда.
Автомашина салонига ва ҳайдовчининг ички чўнтагига беркитилган телефонларнинг божхона расмийлаштирувидан ўтганлигини тасдиқловчи ҳужжатлари бўлмаган.
Фарғонада ҳуқуқни муҳофаза қилувчи орган ходимлари томонидан ўтказилган тезкор тадбир давомида "Водил-Марғилон" йўналишида ҳаракатланаётган фуқаро бошқарувидаги "Ласетти" машинаси Фарғона шаҳри Қиргули мавзесида белгиланган тартибда тўхтатилиб, холислар иштирокида кўздан кечирилди.
Кўздан кечириш натижасида, автомашина салонининг 3 та жойига ва ҳайдовчи кийимлари ичига яширилган, хорижда ишлаб чиқарилган, божхона расмийлаштирувидан ўтганлигини тасдиқловчи ҳужжатлари бўлмаган, умумий қиймати 394 миллион сўмлик 3 турдаги жами 28 дона iPhone 15 уяли алоқа воситалари борлиги аниқланиб ашёвий далил тариқасида вақтинча сақловга олинди.
Ҳозирда мазкур ҳолат юзасидан божхона органлари томонидан терговга қадар текширув ҳаракатлари олиб борилмоқда.
