"Ўзбекистон бўйлаб саёҳат қил" ички туризм ярмаркаси ташкил этилади

 

2024 йилдан бошлаб ҳар йили “Ўзбекистон бўйлаб саёҳат қил!” ички туризм ярмаркаси “тадбиркор билан тадбиркор” ва “тадбиркор билан мижоз” механизмлари асосида ташкил этилади.

 

Лойиҳага мувофиқ, 2024 йилдан бошлаб ҳар йили “Ўзбекистон бўйлаб саёҳат қил!” ички туризм ярмаркаси:

март ва август ойларида – Қорақалпоғистон Республикаси, вилоятлар ва Тошкент шаҳрида “тадбиркор билан тадбиркор” (B2B) ва “тадбиркор билан мижоз” (B2C) механизмлари асосида;
декабр ойида – республикада “тадбиркор билан тадбиркор” (B2B) механизмлари асосида ташкил этилади.

Белгиланишича:

— ярмарка 2024 йилда Туризмни қўллаб-қувватлаш жамғармаси маблағлари ҳисобидан;

 

— 2025 йилдан бошлаб ярмарка иштирок этувчи тадбиркорлик субъектлари маҳаллий бюджет ва қонунчилик ҳужжатларида тақиқланмаган бошқа манбалар ҳисобидан ўтказилади;

 

— ярмарка доирасида давлат буюртмачиларига харид жараёни очиқлигини таъминлаган ҳолда ўз ходимлари учун Ўзбекистон бўйлаб саёҳатларни ташкил қилиш мақсадида энг яхши таклифларни танлаш натижаларига кўра туристик маҳсулотларни харид қилишга рухсат берилади;

 

— ярмарка доирасида Туризм қўмитаси томонидан туризм соҳаси субъектларининг фаолиятини намойиш қилувчи тайёрланадиган тарғибот материаллар (фото, видео ва бошқалар) ижтимоий ахборотга тенглаштирилади;

 

— 2025 йилдан бошлаб ҳар йили 1 февралга қадар Туризм қўмитаси томонидан ярмаркани ташкил этиш ва ўтказиш билан боғлиқ чора-тадбирлар дастури ишлаб чиқилади;

 

— 2025 йилдан бошлаб ҳар йили 10 февралга қадар Туризм қўмитаси томонидан Ярмаркани ташкил этиш ва ўтказиш билан боғлиқ чора-тадбирлар дастури Вазирлар Маҳкамаси томонидан тасдиқланади.

 

Туризм қўмитаси:

— ярмаркалар ўтказилишидан камида икки ҳафта олдин тарғибот тадбирларини ташкил қилишни;

 

— ярмаркаларга ички туризм йўналишида фаолият юритувчи туроператорлар, дам олиш масканлари, меҳмонхоналар ҳамда транспорт ташкилотларини иштирокини;

 

— ярмаркаларга иштирок этувчи тадбиркорларни рўйхатини олдинда шакллантиришни;

 

— ярмаркалар якунлари бўйича эришилган келишувлар ва шартномаларни рўйхатга олишни ҳамда мониторингни олиб боришни;

 

— оммавий ахборот воситалари шу жумладан, кўп сонли аудиторияга эга бўлган блогерларни жалб қилган ҳолда мамлакат бўйлаб саёҳатга ундовчи турли видеороликлар ишлаб чиқишни таъминлайди.