Ҳиндистон чегарани қўриқлаш учун 10 минг аскар юборди
Шунингдек, 9 минг аскар жанговар қўмондонлик таркибига ўтказилади.
Ҳиндистон Хитой билан чегарани қўриқлаш учун қўшимча 10 минг аскарини юборди. Бу ҳақда Bloomberg нашри хабар бермоқда.
Қайд этилишича, Хитой билан баҳсли чегара ҳудудидаги 9000 аскардан иборат мавжуд контингент янги ташкил этилган жанговар қўмондонлик таркибига ўтказилади. Бирлашган кучлар Хитойнинг Тибет минтақасини Ҳиндистоннинг шимолий Уттаракҳанд ва Ҳимачал-Прадеш штатлари билан ажратиб турадиган 532 километрлик чегара чизиғини қўриқлайди.
2020 йилда ХХР билан чегарада содир бўлган тўқнашув натижасида камида 20 ҳинд чегарачиси ҳалок бўлган, бу эса икки давлат орасидаги алоқаларни жиддий равишда ёмонлаштирганди.
Ўшандан бери Хитой ва Ҳиндистон чегарадаги ҳарбий инфратузилмаларини янгилади, шунингдек, қўшинлар, ракеталар ва самолётларни чегара олди ҳудудларга жойлаштирди.
