2023 йилда салкам 150 та киномаҳсулот яратилди
5 та хорижий давлат билан Англашув меморандумлари ва ҳамкорлик дастурлари имзоланиб, 4 та давлатда “Ўзбекистон маданияти кунлари” ҳамда Ўзбекистонда 4 та хорижий давлатнинг “Маданият кунлари” ташкил этилди.
АОКАда Маданият вазири Озодбек Назарбеков ва мутасаддилар иштирокида ўтказилган матбуот анжуманида тизимда 2023 йилда амалга оширилган ишлар сарҳисоби ва 2024 йилдаги устувор вазифалар ҳақида маълумот берилди.
Республика бўйича ўтказилган 17 202 та концерт-томоша тадбирда 9 миллион 687 минг, театрларда уюштирилган 10 586 та спектакл сеанси орқали 3 миллион 203 минг нафар томошабин, “Ўзбекцирк” давлат муассасасиданинг 604 та цирк томошалари натижасида 42 минг нафар томошабин қамраб олинган.
Ўтган йилда Навоий, Наманган ҳамда Қашқадарё вилоят қўғирчоқ театрлари учун янги бино қурилди, шунингдек, 7 та маданият маркази таъмирланиб фойдаланишга топширилди.
Кинематография соҳасида қатор амалий ишлар амалга оширилди, жумладан, 149 та киномаҳсулот – шундан 21 та бадиий фильм, 73 та ҳужжатли фильм, 10 та мултфильм, 9 та сериал, 36 та қисқа-метражли фильмлар яратилди.
Бугунги кунда Маданият вазирлиги тизимида жами 368 та таълим муассасаси фаолият олиб бормоқда. Жумладан, 324 та болалар мусиқа ва санъат мактаби, 30 та ихтисослаштирилган санъат ва маданият мактаби, мактаб-интернатлари, 2 та коллеж ва 1 та техникум, 5 та олий таълим муассасаси ва уларнинг 4 та филиали ҳамда 2 та малака ошириш марказлари мавжуд.
