Вьетнам билан ўзаро манфаатли ҳамкорлик кенгайтирилади
Танзила Нарбаева Нью-Йоркда Вьетнам Социалистик Республикаси вице-президенти билан учрашди.
Олий Мажлис Сенати Раиси Танзила Нарбаева Нью-Йорк шаҳрида БМТ Аёллар ҳолати бўйича комиссиясининг 68-сессияси майдонида Вьетнам Социалистик Республикаси вице-президенти Во Тхи Ань Суан билан учрашув ўтказди.
Икки мамлакат ўртасидаги ўзаро манфаатли ҳамкорликнинг амалий жиҳатлари муҳокама қилинди.
Во Тхи Ань Суан Остона шаҳрида бўлиб ўтган Осиёда ҳамкорлик ва ишонч чоралари бўйича кенгашнинг навбатдаги саммити доирасида Ўзбекистон Президенти Шавкат Мирзиёев билан бўлиб ўтган самарали суҳбатни ҳамда 2022 йил октябрь ойида Тошкентда қисқа муддатли ташриф билан бўлганини илиқлик билан эслади.
Учрашув чоғида парламентлараро муносабатларни йўлга қўйиш ва ривожлантириш, таълимга оид ва бошқа қўшма гуманитар дастурларни амалга ошириш масалаларига алоҳида эътибор қаратилди.
Учрашув якунида Во Тхи Ань Суан Самарқанд шаҳрида бўлиб ўтадиган Осиё аёллар форумида иштирок этишга таклиф этилди.
