Иссиқхона келтираётган миллиардлар
Сирдарёда фуқаро замонавий усулда иссиқхона ташкил этиб, катта даромад топмоқда.
Сирдарё вилояти Сайхунобод туманида «Зарбдор нурли қуёши» корхонаси раҳбари Раҳимов Тоҳиржон Ҳожимурод ўғли замонавий усулда иссиқхона ташкил этиб, катта даромад топмоқда.
“Туркия ва Корея тажрибаси асосида замонавий гидропоника усулини қўллаган ҳолда иссиқхона ташкил этдик. 24 та янги иш ўрни яратиб, аҳоли бандлигини таъминлашга ҳам баҳоли қудрат ҳисса қўшмоқдамиз. Иссиқхонамиз майдони 1 гектар 20 сотих бўлиб, Туркия давлатига мансуб 24 минг туб дафнис кўчатларини етиштиряпмиз.
1 туп кўчатдан ўртача 5 килограмм, мавсум давомида эса умумий 120 тонна ҳосил оляпмиз. Ички бозорда ўртача 15 минг сўмдан сотган тақдиримизда ҳам, жами 1 миллиард 800 миллион сўм бўлади.
Ҳозирда корхонамиз томонидан янги лойиҳалар йўлга қўйилмоқда. Аҳоли томорқаларига 2-3 сотихли замонавий иссиқхоналарни барпо этиб, йиғилган тайёр маҳсулотни сотиб олиб, экспортини ташкил қилмоқчимиз. Шунингдек, 3 гектар бўш ер майдонини олиб, умумий қиймати 900 минг АҚШ долларига тенг Голландия усулидаги лойиҳа устида иш олиб борилмоқда”, дейди у.
