Бухорода салонида 30 яқин йўловчилар бўлган автобус ЙТҲга учради
Ҳодиса оқибатида автобус йўловчиларидан бири оғир тан жароҳатлари билан шифохонада вафот этди.
Бухорода автобус ва юк машинаси тўқнашди. Бу ҳақда Йўл ҳаракати хавфсизлиги хизмати хабар берди.
Воқеа 18 март куни соат 10:30 лар атрофида Бухоро вилояти, Когон тумани ҳудудидан ўтувчи А-380б автомобиль йўлининг 32-километри ҳамда 4Р-69 автомобиль йўлининг 6-километри кесишган, тартибга солинган чорраҳада юз берган.
1991 йилда туғилган ҳайдовчи О.Ш. бошқарувида бўлган автобус ҳамда 1984 йилда туғилган ҳайдовчи М.М. бошқарувида бўлган юк автомобили тўқнашган.
Оқибатда бир нафар автобус йўловчиси оғир тан жароҳатлари билан шифохонада вафот этган. Шунингдек, бир нафар йўловчи тан жароҳати олган бўлиб, 25 нафар йўловчиларга биринчи тез тиббий ёрдам кўрсатилган.
Айни пайтда ЙТҲ юзасидан терговолди суриштирув ҳаракатлари олиб борилмоқда.
