“Humo air” 284 та рейсни бекор қилиб, йўловчиларнинг пулини қайтармади
Ҳолат юзасидан Рақобат қўмитаси муносабат билдирди.
Ижтимоий тармоқларда “Humo air” мижозларни сарсон қилаётгани ва уларнинг пуллари қайтарилмаётгани ҳақида хабарлар тарқалди. Рақобатни ривожлантириш ва истеъмолчилар ҳуқуқларини ҳимоя қилиш қўмитаси мазкур мурожаат юзасидан расмий муносабат билдирди.
Ушбу ҳолат Рақобат қўмитаси томонидан ўрганиб чиқилганда ҳақиқатан ҳам “Ҳумо аир” МЧЖ томонидан 2024 йилда 284 та авиарейслар бекор қилингани ва авиачипта харид қилган йўловчилар пулларини қайтариб ололмаётганликлари маълум бўлган. Бу билан авиакомпания Ўзбекистон Республикаси “Истеъмолчиларнинг ҳуқуқларини ҳимоя қилиш тўғрисида”ги Қонунининг 19 ва 21-моддалари талаблари бузилганлиги аниқланган.
Қўмита олиб борган ўрганишлар натижасида “Humo air” МЧЖга бугунги кунгача 2000 нафар йўловчининг мурожаати қаноатлантирилган ва авиачипта учун тўлаган 1,5 мрлд сўм маблағ истеъмолчиларга қайтарилиши таъминланган.
Шунингдек, 6 нафар истеъмолчининг талабига кўра, авиакомпания ўз ҳисобидан бошқа авиакомпаниядан 7 млн 498 минг 758 сўмга чипталарни харид қилиб топширган. Авиакомапания томонидан парвози амалга ошмаган қолган йўловчиларга ҳам пулни қайтариш чоралари кўрилмоқда.
