Ўзбекистонда ёмғир сувидан истеъмол учун фойдаланиш таклиф этилди

"Ўзбекистон Экологик партияси мамлакатда ёмғир сувидан фойдаланиш тизимини жорий этиш дастурини қабул қилишни таклиф қилмоқда. Партиямиз бу борада таклифлар ишлаб чиқиб, ҳукуматга тақдим этади", — дейилади хабарда.

 

Маълумотларга кўра, биргина Марказий Осиёда сўнгги 50-60 йил ичида музликлар майдони қарийб 30 фоизга қисқарган, Ўзбекистон эса сув танқислигидан азият чекаётган давлатлар рейтингида 25-ўринни эгаллаган.

 

Экологик партия тўғри тозаланган ёмғир суви турли ишлаб чиқариш жараёнларида қайта фойдаланиш учун маълум талабларга жавоб беради деб ҳисоблайди. 

 

“Мутахассисларнинг фикрича, ёмғир сувидан фойдаланган ҳолда бир киши кунига ўртача 71 литргача ичимлик сувини тежаши мумкин”, — дея қўшимча қилди матбуот хизмати.

 

Ўзбекистон Сув хўжалиги вазирлиги маълумотларига кўра, сув танқислиги туфайли республикада сўнгги пайтларда йиллик сув истеъмоли ўтган асрнинг 80 йилларидаги 64 миллиард куб метрдан 51-53 миллиард куб метргача камайган. Республикада бир киши бошига сувнинг солиштирма истеъмоли йилига 1,56 минг куб метргача камайди, аҳоли сони эса йиллар давомида 15 миллион кишидан 2023 йилда 36,8 миллион кишига ўсди.