Бошқаларнинг картасидан пул ечиб олган фирибгар ушланди
Айни дамда ҳолат юзасидан жиноят иши қўзғатилган.
Бухорода ижтимоий тармоқ орқали турли кўринишдаги сохта ҳаволалар орқали ўзгаларнинг картасидан пул ечиб олган шахс ушланди. Маълум қилинишича, Қашқадарё вилояти Китоб туманида яшовчи 31 ёшли Б.Ф. ички ишлар органларига банк картасидан 909 минг сўм маблағ ўғирлангани ҳақида мурожаат қилган.
Ўтказилган тезкор-қидирув тадбирлари натижасида мазкур жиноятни Бухоро вилояти Когон туманида яшовчи 24 ёшли К.У. содир этгани аниқланган. Шундан сўнг, К.У. гумонланувчи сифатида терговга жалб этилган. Сўроқ қилинганда у интернет фойдаланувчиларига Телеграм орқали турли хил мазмунидаги хабар жўнатиб, уларнинг ишончига кириб, банк карта маълумотларини қўлга киритиш орқали пулларни ўғирлаб келгани аниқланган.
Мазкур ҳолат юзасидан ЖКнинг 169-моддаси 3-қисми "б" банди (ўғрилик қонунга хилоф равишда (рухсатсиз) ахборот тизимига кириб ёки ундан фойдаланиб) билан жиноят иши қўзғатилган.
