Тошкентда кучли шамол сабаб электр авариявий ўчди
Айрим ҳудудлар газ тармоғидан узилиб қолган.
Тошкентда кучли шамол сабаб электр тармоғида авариявий узилишлар кузатилди. Бу ҳақда Энергетика вазирлиги хабар бермоқда.
Қайд этилишича, соат 09:33 да қаттиқ шамол натижасида Тошкент шаҳрида 110 кВли «Л-К-Д» электр узатиш тармоғи 60 МВт қувват билан авариявий ўчган.
Бунинг натижасида Тошкент вилоятининг Пискент, Қуйи Чирчиқ ва Ўрта Чирчиқ туманларида истиқомат қилувчи 12 минг 550 та истеъмолчи, шунингдек, кичик ишлаб чиқариш саноат корхоналари электр таъминотидан узилган.
Ҳозирги вақтда истеъмолчиларни бошқа манбалардан таъминлаш чоралари кўриляпти.
Соат 10:20 да Тошкент шаҳри Чилонзор тумани 19-квартал, Хирмонтепа маҳалласида диаметри 50 мм бўлган паст босимли газ қувури катта дарахт шамол оқибатида илдизидан қўпорилиб тушгани боис узилган. Натижада ушбу ҳудуддаги 16 та кўп қаватли уйнинг 768 та хонадони табиий газдан вақтинча узилган.
Айни пайтда махсус бригадалар томонидан ушбу носозликлар бартараф этилмоқда.
