Тошкентда янги қурилаётган «дом»нинг девори шамолда қулаб тушгани айтилди
Ҳолатга Қурилиш ва уй-жой коммунал хўжалиги вазирлиги изоҳ берди.
Видеода келтирилган ҳолат Тошкент шаҳри Яккасарой тумани КХАЙ кўчаси 2/1-уй манзилида жойлашган буюртмачи «АЛ-ҲУСН» ХК томонидан ер тўлага эга саккиз қаватли офис ва умумовқатланиш биноси қурилишида содир бўлган.
Ҳудудий инспекция томонидан жойига чиқиб ўрганилганда қурилиш-монтаж ишларининг кўп йиллар давомида молиявий сабабларга кўра тўхтатиб турилгани ва ҳозирда объектда қурилиш ишларини давом эттиришга тайёргарлик кўриш жараёнлари кечаётгани аниқланди.
Ёлланма ишчилар томонидан объект деворларини демонтаж қилиш пайтида эҳтиётсизликка йўл қўйилиши оқибатида бетон бўлакларидан бири қурилиш майдонидан ташқарига тушган.
Мазкур ҳолат юзасидан қурилиш-монтаж ишларини лойиҳа ва қурилишда техника хавфсизлиги талаблари асосида олиб борилиши бўйича масъул шахсларга тегишли кўрсатма ва тушунтиришлар бериб ўтилди.
