Тошкентда метрода яна носозлик кузатилди
Расмийлар келтирилган ноқулайлик учун узр сўради.
Бугун, 6 апрель куни Тошкент метросида яна носозлик кузатилди. Ҳолат юзасидан метрополитен расмий муносабат билдирди.
Қайд этилшича, 17:40 лар атрофида Чилонзор йўлининг «Чинор» бекатидан «Янгиҳаёт» бекати томон ҳаракатланган 8-сонли ҳаракат таркибининг вагон эшикларида носозлик ҳолати кузатилган.
Шу боисдан, белгиланган йўриқномага асосан, йўловчилар ва ҳаракат хавфсизлигини таъминлаш мақсадида поезд «Янгиҳаёт» бекатига келгач, йўловчилар бекатга туширилган ҳамда ҳаракат таркиби текширув йўлагига юборилган.
"Ҳозирги вақтда йўналишдаги поездлар белгиланган жадвалга асосан ҳаракатланмоқда. Келтирилган ноқулайликлар юзасидан узр сўраймиз", дейилади хабарда.
