Тошкент аэропортида гул дўкони очилди
У бошқа савдо нуқталари каби 24 соат ишлайди.
Бугун, 13 апрель куни Тошкент аэропортининг учиб келиш зонасидаги кутиб олувчилар павильонида "Air Flowers" бренди остидаги гул дўкони иш бошлади.
Майдони 17 квадрат метр бўлган чакана савдо шохобчаси E-auksion.uz электрон платформасидаги савдолар орқали ўтказилди. Дўкон ассортиментида ҳам тайёр гулдасталар, ҳам алоҳида гуллар мавжуд бўлиб, сотувчи улардан мижознинг хоҳишига кўра гулдаста йиғиши мумкин. Гулларни керакли ҳолда сақлаш учун барча гуллар тегишли ҳаво ҳарорати бўлган махсус кичик хонада сақланади. Гул дўконида гулдасталардан ташқари юмшоқ ўйинчоқлар, қутилар ва совғаларни ўраш материаллари мавжуд.
Пойтахт халқаро аэропортидаги барча савдо нуқталари каби гул дўкони ҳам 24 соат давомида ишлайди. Тўлов учун миллий ва халқаро банк карталари ҳамда нақд пул (ўзбек сўми) қабул қилинади. Шунингдек, кутиб олувчилар залида қаҳва пункти, банкоматлар ва мобил қурилмаларни қувватлантириш станцияси мавжуд.
