Самарқандда фуқарони Исроилга ишга юбормоқчи бўлган фирибгарлар аниқланди
Улар бунинг учун 18 минг АҚШ доллари сўрашган.
Самарқанд ва Қашқадарё вилоятларида хорижий давлатларга ишга юборишини ваъда қилган фирибгарлар ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар бермоқда.
Самарқандда ўтказилган тезкор тадбирда фуқаролар У.Р., З.М. ва А.С. фуқаро Ҳ.Ш.ни 18 000 АҚШ доллари эвазига Исроил давлатига ишга юборишни ваъда қилиб, шундан 2 000 АҚШ долларини олган вақтларда ашёвий далиллар билан ушланган.
Шаҳрисабзда ўтказилган терговга қадар текширувда эса фуқаро А.К. 4 нафар фуқарони Туркия давлати орқали Никарагуа давлатига ишга юборишини ваъда қилиб, жами 35 000 АҚШ долларини фирибгарлик йўли билан қўлга киритганлиги аниқланган.
Мазкур ҳолатлар юзасидан Жиноят кодексининг 168-моддаси (фирибгарлик) билан жиноят ишлари қўзғатилиб, тергов ҳаракатлари ўтказилмоқда.
