Бухорода Ободонлаштириш бошқармаси ходимлари давлатга 1 млрд зарар етказди
Ҳозирда бу бўйича жиноий иш очилган.
Бухоро вилояти Ғиждувон туманида полиэтилен қувурларни қиммат нархларда харид қилиш ҳолати аниқланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Қайд этилишича, Ғиждувон тумани Ободонлаштириш бошқармаси масъул шахслари “Давлат харидлари тўғрисида”ги Қонун талабларига зид равишда “B.K.” МЧЖдан 5,7 млрд сўмлик полиэтилен қувурларни ҳақиқий баҳосидан қиммат нархларда харид қилиб, давлат ва жамият манфаатларига 1 млрд сўм миқдорида зарар етказганликлари аниқланган.
Мазкур ҳолат юзасидан Жиноят кодексининг 205-моддаси (ҳокимият ёки мансаб ваколатини суиистеъмол қилиш) билан жиноят иши қўзғатилиб, тергов ҳаракатлари ўтказилмоқда.
