Вазир хизмат сафарига велосипедда отланди
"Автомобилсиз кун": Экология, атроф-муҳитни муҳофаза қилиш ва иқлим ўзгариши вазири Азиз Абдуҳакимов Тошкент вокзалига юкларини елкалаганча велосипедда келди.
Бугун, 24 апрел Тошкентда навбатдаги “Автомобилсиз кун” акцияси ўтказилмоқда.
Бу Президентнинг “Ўзбекистон — 2030” стратегиясини “Ёшлар ва бизнесни қўллаб-қувватлаш йили”да амалга оширишга оид давлат дастури тўғрисида“ги Фармонида кўрсатиб ўтилган.
Акция доирасида Тошкент шаҳрида жойлашган барча республика ва вилоят ижро ҳокимияти органларининг раҳбар ва бошқа ходимлари жамоат транспорти, велосипед ва атроф-муҳитга зарар етказмайдиган бошқа транспорт воситаларидан фойдаланишади.
Соғлом турмуш тарзига амал қиладиган ва тез-тез ишга велосипедда қатнайдиган Экология, атроф-муҳитни муҳофаза қилиш ва иқлим ўзгариши вазири Азиз Абдуҳакимов бугун ҳам ўз анъанасига содиқ қолди. Бу ҳақда Zamon.uz'га вазирнинг матбуот котиби Лола Раҳмонова маълум қилди.
“Автомобилсиз кун” жамоат лойиҳасига бефарқ бўлманг ва экологик тоза транспорт воситасини танланг!
