Ўзбекистонлик мигрант одамларни ёнғиндан қутқариб қолди
У одамларни 3-қаватдан пастга тушишига кўмаклашган.
25 апрель куни эрта тонгда Санкт-Петербургда жойлашган Подолская кўчасидаги тарихий уй ёниб кетди. Ёнғинга биринчи бўлиб кўча тозаловчи Олим етиб борган.
"Эрталаб соат 6 да ишга келдим. Тўсатдан деразадан олов чиқаётганини кўриб қолдим ва дарҳол ўт ўчириш бўлимига қўнғироқ қилдим. Олов кучайгани сари, одамлар деразадан ташқарига чиқа бошлади. Аёллар қичқириб, деразадан сакрамоқчи бўлди. Мен уларга "Сакраманглар, улар сизни ҳозир қутқарадилар", дедим. Ўт ўчирувчилар аллақачон зинапояни очган эди", деб эслайди ўзбекистонлик мигрант.
Аммо одамлар қўрқувдан учинчи қаватдан сакрашга тайёр бўлган. Шу лаҳзада Олим акробат каби дренаж трубасига кўтарилган. Олим моҳирона ҳаракатлари билан учинчи қаватга кўтарилиб олган ва аёлларга деразадан чиқиб, карнизда туриб олишга ёрдам берган. Кейин ўт ўчирувчилар келиб, нарвонни ўрнатган. Олим аёлларни пастга туширишга ёрдам берган.
